Жалпыға бірдей декларациялау бойынша 250.00 және 270.00 нысан декларациясын тапсырмағандарға айыппұл салынады

Жамбыл облысы бойынша 250.00 нысаны бойынша 27 025 жеке тұлға, 22 352 облыс тұрғыны 270.00 нысаны бойынша декларацияны ұсынбаған.

Қазақстан Республикасының Салық кодексіне сәйкес бұл есептілік нысандары 2024 жылғы 15 қыркүйекке дейін ұсынылуы тиіс. Алайда 2024 жылы 15 қыркүйек жексенбіге, яғни демалыс күніне сәйкес келеді.

Салық кодексінің 38-бабына сәйкес, егер салық міндеттемесін орындау мерзімінің соңғы күні жұмыс істемейтін күнге келсе, онда мерзім келесі жұмыс күнінің соңында аяқталады. Осылайша, 250.00 СЕН және 270.00 СЕН ұсыну мерзімі 2024 жылдың 16 қыркүйегінде аяқталды.

Декларацияны ұсынбаған немесе дұрыс емес ақпаратты көрсеткен тұлғаларға бірінші рет ескерту беріледі. Бір жыл ішінде қайталап бұзған жағдайда, уақтылы ұсынбағаны үшін – 55 380 теңге (15 АЕК), ақпаратты сенімсіз көрсеткені үшін – 11 076 теңге (3 АЕК) көлемінде айыппұл салынады. Салықтардың төленбеуіне әкеп соққан бұзушылықтар үшін айыппұл төленбеген салық сомасының 200%-ын, қайталап бұзғаны үшін 300%-ын (салық салу объектісі жасырылған жағдайда) құрайды.

Декларацияны «Салық төлеушінің кабинеті», «Электрондық үкімет» порталы, «e-Salyq Azamat», «eGov mobile» мобильді қосымшалары, Halyk, Kaspi.kz, Вcc.kz және т.б. банктерінің қосымшалары арқылы беруге болады.